Raíz del pensamientu ye'l corazón,
y el corazón ye llatíu, y nél
el recuerdu y la sombra del so ritmu
perfaen heredá de la nuestra historia.
Nel llatíu humanu guárdense amodo
el vértigu los años, la firida,
el poniente desgarráu que sabe
fundise baxo la piel del silenciu,
la corriente inconstante del deséu,
la llercia, los frutos del suañu, el gozu
de ser y les seduciones del vientu.
Abenayá, y en cualesquier llugar,
podemos conocer el so rumor,
siempre fráxil, desnudu, inevitable,
dientro del cuerpu, y tan lloñe del tiempu,
del nacer a la muerte inesorable.
Somos los fíos remotos del agua
y por ello sentimos nel llatíu
-qu'apruz en primóxenu manaderu-
les esperances, la palabra, l'íntimu
aliendu que nos alimenta, l'ecu
d'aquellos momentos yá inalcanzables.
El llatíu humanu ye como nós,
de barru, efímeru, indesarreyable;
pero tamién ye esi reló de sangre
qu'hores mide a un alma que perdura
impregnada de lluz y de memoria.
0 comentarios:
Publicar un comentario en la entrada